جبل موسى وسانت كاترين

تجهيزات السفر الى سانت كاترين وكل ما تحتاجه قبل الذهاب لمغامرة صعود الجبل

تعرف على اهم التجهيزات الشخصيه والبدنيه الخاصه بالسفر الى سانت كاترين واهم الادوات التى تحتاجها قبل الصعود الى الجبل بالاضافه الى اهم المعلومات عن معالم سانت كاترين واهم النصائح التى تحتاجها قبل السفر

على الرغم ان الرحله دى شاقه جدا جدا ومش اى حد بيروحها بس هى غايه في الروعه والمتعه والمغامره ... 

1-  معالم سانت كاترين و تفاصيل كل شبر فى المنطقة دى 

انت بتمشي في مدقات جبلية تصاعدية مسافة 7 كيلو ثم بتوصل لنهاية المدقات وبتطلع 750 سلمه إسمهم طريق التوبة ...
درجة الحراره تحت الصفر ومهما كنت لابس هتلاقي جسمك متجمد وخصوصا أما توصل للقمه .

الظلام دامس ومش بينفعك غير نور بطاريتك عشان تعرف تمشي في طريقك للقمة ...وعشان كده بتتفق مع الدليل البدوي على كلمة سر بتنادوا  بيها لبعض عشان محدش يتوه في الجبل او عن المجموعه ...

لما تقرأ قصة سيدنا موسى قبل ما تروح لهناك. هتحس وكأنك شايف وحاسس بروحه وعايش الاحداث فى اللحظه دى ...
ولما تطلع الجبل اللى ظل عليه سيدنا موسى عليه السلام اربعين يوم طلوعه بيستغرق حوالي ثلاث ساعات بين الراحة والصعود .. انت متخيل انك تطلع المكان اللى كلم الله نبيه فيه .. 

فى المكان دة بيجي السياح من جميع بقاع الأرض عشان يشوفوا الشروق من النقطه دى واللى مفيش  ليها مثيل فى اى بقعه من الارض بتلاقى الشمس بتشرق وتشوفها وهي بتخرج من بطن الجبل ونفس الحكايه بالنسبة للغروب بترجع تانى لتبيت داخل الجبل ...ده غير ان السحاب بيبقى تحت منك وبتبقى اعلى منه و ده لوحده منظر خرافي مش موجود غير على جبل موسى ...

طول ما انت ماشي بتسمع حكايات تراث من الدليل البدوي يتناقلوها عبر الأجيال ...
وكل مكان في جبل موسى وسانت كاترين ليه قصه وليه حكايه ....

هتشوف كمان الوادي المقدس اللى جاءه سيدنا موسى ليلا ليأخذ قبسا من النار فكلمه ربه وهتشوف الشجرة العتيقة اللي توهجت بنور الله لما كلم الله سيدنا موسى و الشجره دي بقالها 3400 سنه و معجزة الشجره إنها طول السنه أوراقها خضراء مش بتنشف ولا في ورق منها بيقع ولما أخذوا منها لمحاولة زراعتها تانى منبتتش  ... 

وهتشوف مقام النبي هارون أخو سيدنا موسى بس دة مش مقاما لقبره لان قبره مش  موجود هنا بس كلمة مقام مقصود بيها هنا " لإقامته فيها فترة من الوقت "  ...

المنطقة بيغطيها الجليد في الشتاء واما تسأل الدليل البدوي الثلج أحسن ولا المطره هيقولك الثلج أفضل عشان أما بيدوب بيملى الدير مايه و يروي الزرع .. 

هتمر على حاجه اسمها كهف الغوله .. و ده كهف كان الهوا بيدخله وبيعمل صوت زي زماره غليظة واعتقدوا زمان إن سكانه غوله وعشان كده إتسمى كهف الغوله ..

في اخر الرحله هتعدي على دير سانت كاترين اللى مكانه عند سفح (جبل موسى) ويرتفع بحوالي 1585 مترا عن سطح البحر .. ودة اللى بتجتمع الديانات فيه في مكان واحد .. داخل الدير مسجد بناه الحاكم بأمر الله الفاطمى ليضم الدير الديانات السماويه الثلاث ... ويضم أيضا الشجره العتيقه وبئر موسى ...

الجبل و المكان فيه روح طيبه و بركه غير عادى  ... اول ما تدخله هتحس بحاله من الهدوء والصفاء النفسى والسعاده الداخليه محستهاش قبل كدا ..  مع ان المنطقه دى  محاطه بجبال عالية جدا وتبعد عن شرم الشيخ تقريبا 250 كم. وعن نويبع تقريبا 170 كم وعن مدينه الطور 200 كم تقريبا منعزله لوحدها .. ودا سر جمالها وهدوئها ..

بعد الدير بشويه هتلاقي عجل منحوت على الجبل و ده قصته ان لما نزل سيدنا موسى بالألواح وتعاليم التوراه وجد السامري صنع العجل بذهب النساء اليهوديات فأخذه وقذفه فى الجبل ولحد دلؤقتى بتشوف رؤي العين صوره العجل مطبوعة على الجبل ...
لما تشوف منظر النخل وهو طالع من قلب الصخر لازم تقف وتقول سبحان من أخرجها من الصخر ..

دى كل حاجة هتشوفها هناك تقريبا بس ناقص الجزء التانى من مقالنا ودة الاهم وهو : 

2- التجهيز لصعود جبل سانت كاترين والأدوات المستخدمة فى الصعود :

التجهيزات البدنية :
 

رفع اللياقة البدنية : لو انت ممارستش الرياضة لمدة 3-5 شهور لازم تتمرن على رفع اللياقة البدنية قبل موعد الرحلة ب شهرين من خلال عمل تمارين تقوية عضلة القلب و تنظيم النفس ، و تمارين تقوية و ليونة لعضلات الرجل و خاصة السمانة و الفخذ و منطقة اربطة الركبة ، و تمارين تقوية عضلات الظهر و خاصة منطقة الاسفل الظهر ، و تمارين ليونة لعضلات الكتاف و الرقبة.

-كل دة ليه ؟  هتقولى فى ناس كتير بتروح من غير ما تعمل كدا .. فعلا فى ناس بتروح من غير التجهيز دة بس اللى بيحصل عند صعود الجبل خصوصا ارتفاعه  2.285 م فوق سطح البحر و خصوصا كمان فى فترة الشتاء و سقوط الثلوج و درجة الحرارة بتصل لاكثر من -12 درجة مئوية بيحصل الأتى :

ضيق النفس و الم فى عضلة القلب  مثل ألم الذبحة نتيجة قلة الاكسجين مع صعود أعلى من 1000 متر فوق سطح البحر وزيادة الضغط الجو دة بيثقل وزن الجسم و والجسم مبتحملش  الضغط و قلة اللياقة ، وبيحصل  تشنج فى اربطة الركبة خاصة لقلة المرونة و انخفاض درجة حرارة الجسم بيقلل من ليونة العضلة و الاربطة ممكن يؤدى الى تمزقها احيانا .

التجهيزات الشخصية لرحلة سانت كاترين واللبس اللى هتحتاجه خاصة فى فترة الشتاء :

 للاسف معظم الناس ملهاش خبرة فى التخييم و أدواته و خصوصا التخييم فى المناطق الثلجية بسبب طبيعة مصر الشبه صحراوية ف لازم قبل ما تروح تعرف ايه  التجهيزات اللى محتاجها قبل السفر  :

1- ضرورى تلبس تحت اللبس الاساسى بنطلون حرارى قطن و تيشرت قطن حرارى بكم  : ممكن تشتريه من محلات الرياضية وبالأخص محلات لاعبى الكورة او من محلات قطونيل ”

2- لبس بنطلون جينز مريح أو بنطلون باجى تقيل ”قماش جبردين ”

3- لبس قميص شتوى و بلوفر برقبة طويلة قطن مش صوف عشان متعرقش كتير وتفقد المايه من جسمك  و وعشان كمان متعرضش جسمك للفحة هواء فى الصدر ممكن تعملك نزلة شعبية فى الصدر

4- لبس سويتر يحميك من المطر ويدفيك و يكون خفيف فى نفس الوقت عشان ميقيدش الحركة بتاعتك  و يثقل من وزنك.

5- لبس ايس كاب وكوفيه وجوانتى خاص للثلج 

6- لبس عدد 2 شراب رياضى ثقيل قطن لمنع تجمد الأطراف

 

أما بالنسبة للمستلزمات والادوات المستخدمة فى صعود الجبل بتكون عبارة عن :

1- شنطة ظهر مريحة ومصممه كويس للظهر و تستحمل المطر و التراب

2- شنطة اسعافات صغيرة : وممكن تحضرها بأنك تشترى مقلمة صغيرة تحط فيها ادوية للصداع و الدوار و الاسهال و السخنة و البرد و مرهم للشد العضلى ومرهم ضد لدغات الحشرات و زجاجة رش كحل و بلاستر و رباط ضاغط ،" الرباط الضاغط الخاص لاصابات الركبة و الايد  مهمين جدا لانها سهلة اللبس فى حالة الاصابة خصوصا اكثر الاصابات تكون بسبب التواءالرجل او سقوط على اليد.

3- كشاف او كشاف الرأس دة ممكن تجيبه من اى محل كهرباء او فى محلات السوبر ماركت او كارفور أو مترو

4- بوصلة مغناطيسية مش مائية لأنها بتتأثر بالحرارة . ممكن بردو تلاقيها فى كارفور فى قسم التخييم ، و يفضل طباعة الخرائط الخاصة بالمنطقة سواء منطقة جبل موسى او الوديان .. و لازم تعرف ازاى تحدد الاتجاهات و قراءة الخريطة لأنه للاسف فيه كتير بيتوه بسبب الانفصال عن مجموعة .. فى حالة رحلات الوديان أو طول الجبل

5- صفارة .. ودى مهمة جدا تكون فى جيب القميص او البنطلون بتنفع جدا فى حالة التوهان من المجموعة أو السقوط فى منطقة وعرة خصوصا صوت الفرد صعب سماعه فى مناطق زى دى فالبتالى يكون سهل سماعك بعد الشر فى الحالة الطوارىء

6- شراب رياضى قطن احتياطى فى حالة ابتلال القدم حتى يكون معك واحد الأخر جاف 

7- بطاريات احتياطية للكشاف . وخد بالك انك لازم  تدفيها من خلال انك تحطها ملفوفه فى قماشه او حاجة زى كدة عشان  البطاريات بتفقد طاقتها بسبب انخفاض درجة الحرارة يعنى لو فاكر انك بردو هتطلع وتتصور بالموبايل فوق ف الموبايل عمال ما تطلع هيكون فصل حتى لو كان 100 % اللى بينفع فى موضوع التصوير دة هو الكاميرات بس 

8- شال او ايس كاب و جواتنى احتياطى فى حالة ابتلال اللى انت لابسهم 

9- حبل عريض طوله 3 متر احتياطى لتثبت نفسك اوينفع فى حالة انقاذ دة فى حالة سقوط فى منطقة ورعة

10- عدد 2 زجاجة مياه... واحدة لتر فى كيس محكم جدا لتكون دافية عند الشرب ويرجى الشرب و الراحة كل 20 دقيقة و شرب 3 مرات فقط لتعويض الفائض من العرق ” حتى لو فى ثلوج و درجة -12 ” , كمان متترددش من دخول الحمام خلال صعود الجبل

11- فى فترة الشتاء لازم يكون معاك  حلويات حرارية زي الفولية او سنيكر او اى شوكلاتات بس عشان تديلك طاقة فى الشتاء و البسكويت مش مستحب لانه يمتص الماء من الفم فـ هتحس بالعطش المؤقت وبالتالى هتفقد مخزون الماء الاساسى فى الرحلة  - ذبدة كاكاو لمنع تشقق الشفايف .. وفى حالة الطقس المثلج متحاولش تنزل الشال والكوفية عن الانف المبلول أو الشفاه المبولة عشان هتتجمد من السقعه

12- وجود غطاء مطر Ran cover فى حالة المطر يلبس على الراس و يغطى باقى الجسم بالشنطة ودة بالاضافة لوجود بطانية حرارية للتدفئة فى فترة الاستراحة او مساعدة حد تعرض لصدمة برد من انخفاض درجة حرارة .

13- يبقى معاك كتيب الاسعافات الأولية لحدوث أي طوارئ

14- شراء صديري فسفورى للطوارىء فى حالة التعب بيسهل فرصة العثور عليك

15- مهم جدا العصا ال hiking لانها بتساعد فى تقليل الوزن عن الجسم و تساعد على تسلق المناطق الورعة و ممكن تشتريها من المحلات الرياضية او  كارفور .. فى حال انك ملاقتهاشممكن تجيب عصاية خشبية طولها 155 سم و تسنفرها وتدهانها عند الاستورجى و المهم تكون قطرها عريض يتحمل الوزن ويكون خشب زان أو احمر

16- شراء حذاء سفتى هايكنج هاف بوت مش سفتى عادى عشان يكون مريح و يستحمل الصخور وفى حالة سقوط صخور عليه  كمان ممكن شراءه من محلات تمبرلاند ، معلومة حذاء السفتى العادى ده مفيد فقط للمشى لفترة قصيرة او روكوب العربية  لانه وزنه ثقيلة مما يسبب تشنج فى بطن الرجل و عضلة الخلفية للفخذ و السمانة .

 التجهيزات الاخيرة الخاصة للذهاب لسانت كاترين وجبل موسي:

 وهى انك لازم تنسق مع مكاتب المرشيدن المحليين ومتطلعش لوحدك  .. ولو هتطلع لواحدك لازم يكون معاك 2 من المرشدين يأما لو مع مجموعة  يكون عددها مايذدش عن 15 فرد بس ويكون معكم 3 مرشدين محلين ، وطبعا مينفعش الصعود مع اعداد كبيرة  زى 50 فرد مثلا !!! فــ مهم جدا كمان التنسيق مع المرشد المحلى على ايه هى مسارات الصعود و والنزول.

لازم تختار معياد مناسب بعيدا عن تقلب الطقس .. افضل مواعيد لطلوع جبل موسى هو من شهر  اكتوبر ل أول يناير  يأما من منتصف ابريل لمنتصف يونيو

الملحوظة الهامة جدا : انك لازم تبات يوم كامل فى مدينة سانت كاثرين قبل طلوع الجبل عشان تدى الفرصة لجسمك انهيرتاح تمام من طول السفر و الاهم تعود الجسم على الضغط الجوى و نسبة الاكسجين فى الجو فى بمنطقة سانت كاترين خصوصا فى فترة الشتاء .. معظم الرحلات او كلها بتسافر ليلة و تطلع فى ليلة تانى يوم الجبل الفجر.. دة مش صح خالص 

واخيرا بقى عشان كلنا بنحب التصوير اتصاحب على فوتوجرافر هيظبطك صور طول اليوم وانت ظبطوا اكل وحركات وكدا لان الصور اللى هتتصورها هتبقى بحياتك كلها

النزول سهل وخليك قريب من الدليل البدوى صدقنى هيخليك تتصور صور تحفه وعارفين الاماكن وانتوا نازلين كمان خليكم مع الدليل ليهم اختصارات بتخليكم تخلصوا الجبل فى ساعتين ونص مثلا

وفى حاجة مهمه جدا جدا *البريك*
وانتوا بتاخدوا البريك فى الاستراحات متكتريش عن دقيقه عشان لو قعدت جسمك هيريح وممكن متقدرش تكمل  لكن البريك دايما خليه نص دقيقه او دقيقه تاخد بق مايه وتكمل..

والشباب اللى هتاخد مايه تشربها كحول يعنى .. فى نقطه تفتيش بتاخد منك كل دا ولو عرفت تخبيها انت وشطارتك بس هتتفتش فخلى معاك بقى احتياطى البور هورس 

  دى تقريبا كل حاجة تخص سفرية سانت كاترين

تبدأ رحلة البحث عن وجهات شهر العسل للعروسين  حيث انها رحلة مهمة للغاية، حيث يجب أن تكون رومانسية وهادئة ومثالية تمامًا.

 احرص على اختيار وجهة غريبة مثل مصر ولن تندم على ذلك، فهي تتمتع بكل ما يمكن أن يحلم به أي زوجين.

لنستعرض بعض أفضل وجهات شهر العسل في مصر لتوفير عناء البحث عنك.

سهل حشيش

على بعد 18 كم من الغردقة، وهو منتجع خليج يقع على ساحل البحر الأحمر المصري. تم تصميم المنتجع بأكمله على طراز الأرابيسك، حيث يقدم أفضل الفنادق والإقامات لقضاء شهر العسل. على الرغم من أن المنتجع يوفر العديد من الأنشطة المائية، إلا أنه معروف في الغالب بشواطئه الرائعة ورماله البيضاء النقية. لقضاء شهر عسل مثالي مفعم بالرومانسية، فسهل حشيش هو المكان المناسب. توفر الفنادق هناك غرفًا مزودة بحمام سباحة خاص مع أحواض المياه الساخنة الضخمة وأجواء رومانسية لا مثيل لها.

دهب

هي مدينة ساحلية خلابة أخرى تقع على بعد 500 كم من القاهرة، وتتميز دهب بموقعها الساحر على البحر الأحمر الذي يخطف الأنفاس بعجائبه النفيسة تحت الماء والذي يطل أيضًا على الصحراء.

في دهب، يمكنك التمتع بمجموعة متنوعة من الأنشطة بما في ذلك تسلق الصخور وركوب الأمواج شراعيًا والمشي في الصحراء والغطس والغوص.

تمزج دهب بين الإقامة الملائمة للميزانية إلى جانب أسلوب الحياة العصري الهادئ، وتظل دهب وجهة بديلة لقضاء شهر العسل ومكانًا رائعًا للرياضات المائية.

الأقصر وأسوان

وأخيرًا، بالنسبة لأولئك الأزواج الذين يحبون التاريخ والمناظر الرائعة التي تطل على نهر النيل، فإن الأقصر وأسوان هما بالتأكيد الوجهة المناسبة.

 إن أفضل طريق لزيارة الأقصر وأسوان، هو من خلال رحلة نيلية فاخرة لمدة ثلاثة إلى أربعة أيام يمكنك حجزها. وعادةً ما تتولى هذه المراكب ترتيب الرحلات السياحية للمعالم التي يجب مشاهدتها، لذلك لن يفوتك أي شيء. عد بآلة الزمن إلى الوراء مع المعابد المصرية القديمة والمعالم الأثرية وتأمل ضفاف النيل المبهرة في هذه الأثناء.

الإستفسارات – الحجز
شركة دانه للسياحة و السفر
العنـوان		70 ش جامعة الدول العربية – المهندسين – جيزة – مصر
تليفــون		33363910/11/12/13
المواعيد		يومياً من 9:30 صباحاً إلى 5:30 مساءً - الجمعة  أجازة
قسم السياحة الداخلية - مصر
محمـول		01272   743   606
قسم السياحة الخارجية – العالم
محمـول		01111  278  101
قسم التأشيرات والتأمين الدولى
محمـول		0100  580 51  08
قسم حجز تذاكر الطيران
محمـول	0121  202  00   55
	E-Mail  ashraf.kamal@danatours.com.eggihan.eisa@danatours.com.eg
	www.danatours.com.eg  -    www.danabooking.online